منتديات فنان سات - تركيب 4 قطع على طبق 70 سم

طريقة تركيب الاستاند والمشاكل التى ممكن ان تواجهك وانت لسه بتركب الاستاند ودى انا شرحتها فى مشاركة لى فى شرح تفصيلى لتركيب النايل سات من طق طق الى سلام عليكو

القى عليها نظرة علشان ما يقبلكش مطب وتتعطرس فيه المهم

انت بعد ما تركب الاستاند وتقفل الطبق وتجمعه مظبوط تجيب ترد من القمر الاروبى يكون قوى مثلا تردد 11766 راسى 27500 وتحاول تظبط الطبق على هذا التردد الى ان تاتيك الاشارة وتجمع بقية مسامير الطبق الى حدا ما بمعنى انك تسيب فيهم براح لانك ممكن تحرك بعض الشى
المهم بعد ما تظبط التردد مثلما قلت لك نجيب تردد يكون ضعيف مثلا تردد قناة الفوكس 11054 افقى 27500 وتحاول تجيب اعلى اشارة على هذا التردد ولما ينظبط معاك اعلى اشارة اربط الطبق جيدااااااا

وبعدين يا سيدى نيجى للنايل سات وهو بيكون بيمين القمر الاروبى واعلى قليلا بمعنى انت هتمسك القطعه فى ايدك وتجيب تردد يكون قوى على النايل سات وليكن 11747 عمودى 27500 وبحوالى من 10 الى 15 سم من القطعه الاروبى تحاول تحريكها **وعلى فكرة المساطر الجاهزة تريحك فى تركيب الطبق 70سم ** هتحرك القطعة لحد لما تجيب معاك اشارة جيدة وتثبتها جيدا **وعلى فكرة كمان علشان اكون صريح معاك بعض القنوات لن تعمل معك على النا يل سات وهى الترددات المنخفضة لان هذه التردد ليست اصلا على النايل سات هى موجوده على قمر بجواره يسمى اتلانتيك بيرد ده علشان ما تتعبش نفسك

كده بيكون انت وصلت الى منتصف المشوار لو عايز تريحلك شويه وتاكلك سندوتش وتشرب شوية شاى وسيجارة ما فيش اى مانع الموضع بسيط واحنا اخوة ولازم نستحمل بعض خلصت السندوتش والسيجارة والشاى
نرجع للموضوع بتاعنا
القطعة الثالثة نختار ايه عربسات ولا قبرص نختار فبرص
انت هتجيب القطعة وتمسكها بايدك وتجيب تردد القناة الاولى المصريه 11766 افقى 27500 وبين النايل سات والاروبى ناحية الاروبى قليلا وتحاول البحث عن اشارة هذا التردد الى ان تصل الى اعلى درجه من جودة الاشارة ** ونصيحة خاصة علشان تشتغل تحصل على نتائج طيبة انك تجيب القائم بتاع الطبق الى هو شايل القطعه الاروبى وبقية القطع قبل التركيب وتفتحه كام فتحه بالشنيور علشان القطع لاتؤثر على بعضها البعض
**ونصيحه كمان بعد ما تركب القطعه الثالثة**قبر** تراجع على القمرين النايل سات والاروبى لانهم ممكن يكونوا اتحركوا وانت بتركب القمر القبرص لو لقيتهم شغالين تمام يبقى كدا ميت فل وعشرة لو فيهم مشاكل تقطيع بيكونو محتاجين ظبط قليل جداااااااا

القطعة الرابعه والاخيرة العربسات وهى بتكون على شمال القمر الاروبى من5سم الى 10 سم تجيب تردد يكون اشارته قويه وتحرك القطعه حتى تحصل على اعلى اشارة وعلى فكرة بعض البا قات لن تعمل معك ايضا

وبد كده توصلهم على الدايزك وكل قطعه ليها مدخل محدد علشان تشتغل معاك

ولو انت عملت الشغل ده علىطبق اكبر شوية هتكون النتائج رائعه وممكن تركب على الطبق الكبير قطعه خامسه زى القمر تلستار وعليه شوية قنوات زى الفل

ولو انت غاوى قوى وعفريت فى التركيب بس تكون فاضى ودماغك مش مشغولة بحاجه ويكون الطبق كبير شويتان العب براحتك بقى فى الاقمار

ممكن تركب على الطبق 180سم شوية اقمار